Ruta: fervenzas do Arnego

Río Arnego

O río Arnego é un afluente do Ulla que nace entre a Serra do Faro e a Pena de Francia e xúntase ao Ulla no encoro de Portodemouros. Ten varios tramos nos que se encaixa e forma canóns, rápidos e pequenos saltos. Nas súas marxes consérvanse os mellores grupos de sobreiras de Galicia protexidos no LIC “Sobreirais do Arnego”.

Propoñemos unha ruta para coñecer varias fervenzas no Arnego e no seu afluente Porto Marcelín, nun percorrido entre Agolada e Vila de Cruces: Rego Porto Marcelín, un afluente do Arnego que pasa a carón dos Baños de Caldelas de Vilariño (Vilariño-Agolada); Vilariño (no linde entre Agolada e Lalín), e Toiriz, en Vila de Cruces.