Ruta: praia de Carnota

Un percorrido a pé polas praias e dunas de Carnota e Caldebarcos 

A enseada de Carnota, que se acolle entre a punta de Caldebarcos e Portocubelo, abeirada por un dos conxuntos de areais máis extensos de Galiza, é un magnífico lugar para pasar varias horas camiñando polas propias características do lugar, area fina e compacta pola que e moi doado camiñar, e o escenario que a complementa, un escenario que ten como pano de fondo a impoñente masa de pedra do monte Pindo e polo frente o cabo de Fisterra e o mar infinito. A praia de Carnota e as dunas de Caldebarcos forman un sistema de marismas e dunas fixadas pola vexetación separadas do mar por un extenso areal duns 7 km de lonxitude, no que desembocan os ríos Valdebois e Arlindas. Forma parte, xunto cos montes do Pindo e Buxantes e as Illas Lobeiras, do LIC “Carnota-Monte Pindo”.